РУС АДЫГ

ЛIышъхьэр Iофыгъо пэпчъ лъэплъэ

15.09.2017

Станицэу Къурджыпс дэт еджапIэм испорт-зал агъэцэкIэжьыщт, унашъхьэр зэблахъущт ыкIи гъэстыныпхъэ шхъуантIэм пагъэнэщт

Адыгэ Республикэм и ЛIышъхьэу КъумпIыл Мурат тыгъуасэ Мыекъопэ районым зыщэIэм станицэу Къурджыпс игурыт еджапIэу N 6-м екIолIагъ.

Республикэм щыпсэухэрэм гумэкIыгъоу къагъэнэфагъэхэм ядэгъэзыжьын къыдыхэлъытагъэу Урысые Федерацием и Президент къыгъэуцугъэ пшъэрылъхэм ягъэцэкIэнкIэ мыр апэрэ дэкIыгъоу щытыгъ.

Къэралыгъом ипащэ зыфэзыгъэзагъэхэм яIофыгъохэр зэхэфыгъэхэ зэрэхъурэм республикэм ипащэ ежь ышъхьэкIэ лъыплъэщт, ащ пае чIыпIэхэр къыкIухьэхэзэ Iофхэм язытет зыфэдэ шъыпкъэм зыщигъэгъозэщт. Шъугу къэдгъэкIыжьын, бэмышIэу щыIэгъэ зэIукIэгъум илъэхъан УФ-м и Президент КъумпIыл Мурат къыритыжьыгъ папкэ уцышъоу Адыгеим щыпсэухэрэм зызэрэфагъэзэгъэ лъэIу тхылъхэр зыдэлъхэр.

Станицэу Къурджыпс дэсхэм къоджэ еджапIэм игумэкIыгъохэр къэралыгъом ипащэ лъагъэIэсыгъэх. Джырэ уахътэ ащ сабыи 191-рэ щеджэ. Псэуалъэр лIэшIэгъуныкъом ехъукIэ узэкIэIэбэжьмэ ашIыгъ ыкIи непэрэ шапхъэхэм адиштэжьырэп. Классхэм язытет дэи, спортзалым иджэхашъо шъугъэ, унашъхьэм къыкIэщхы, гъэстыныпхъэ шхъуантIэр ещэлIагъэп.

КъумпIыл Мурат учреждением изытет уасэ фишIыгъ, районым ипащэу Алексей Петрусенкэм, АР-м гъэсэныгъэмрэ шIэныгъэмрэкIэ иминистрэу КIэрэщэ Анзаур ыкIи еджапIэм ипащэхэм докладэу къашIыгъэхэм ядэIугъ. Ахэм къызэраIуагъэмкIэ, гъэсэныгъэм иучреждение газыр зэрэращэлIэщтым исметэ агъэхьазырыгъ, нэмыкI IофшIэнхэм пэшIорыгъэшъэу апэIухьащт мылъкур къалъытагъ.

АР-м и ЛIышъхьэ профильнэ министерствэм ыкIи муниципалитетым пшъэрылъ афишIыгъ охътэ кIэкIым къыкIоцI гумэкIыгъо къызпыкIырэ Iофыгъохэр зэкIэ дагъэзыжьынхэу: унашъхьэр зэблахъунэу, спортзалыр агъэцэкIэжьынэу, еджапIэр гъэстыныпхъэ шхъуантIэм пагъэнэнэу. Непэрэ мафэм щегъэжьагъэу учреждением игъэцэкIэжьын зэрэфежьэщтхэр пытагъэ хэлъэу къыIуагъ министрэу КIэрэщэ Анзаур.

АР-м и ЛIышъхьэ райсоветым ыкIи республикэ Парламентым идепутатхэр, джащ фэдэу бизнесменхэр ыкIи цIыфхэр мы IофшIэным нахь чанэу къыхэлэжьэнхэу закъыфигъэзагъ.

— ЗишIуагъэ къэзыгъэкIон зылъэкIыщт предпринимательхэр мы псэупIэми дэсых, районми исых. Бизнесым IэпыIэгъу тыфэхъу, арышъ, предпринимательскэ сообществэми тызэхишIыкIынэу тэгугъэ. МыщкIэ опыт гъэнэфагъэ тиI, — къыIуагъ зэфэхьысыжьхэр къышIызэ КъумпIыл Мурат.

ЕджапIэм щыкIагъэу иIэхэм ядэгъэзыжьын ны-тыхэр къыхагъэлажьэхэ зэрэмыхъущтыр АР-м и ЛIышъхьэ къыкIигъэтхъыгъ.

Адыгэ Республикэм и ЛIышъхьэ ипресс-къулыкъу



Возврат к списку