РУС АДЫГ

Щагухэр зэрэзэтырагъэпсыхьагъэхэр ыуплъэкIугъ

07.09.2018

«ЩыIэкIэ Iэрыфэгъу къэлэдэсхэм яIэныр» зыфиIорэ проектэу 2018 — 2020-рэ илъэсхэм ателъытагъэм игъэцэкIэн къыдыхэлъытагъэу Мыекъуапэ ищагухэу зэтырагъэпсыхьагъэхэм ащыщхэм Адыгэ Республикэм и ЛIышъхьэу КъумпIыл Мурат тыгъуасэ ащыIагъ. Мыщ IофшIэнхэр зэрэщагъэцэкIагъэхэм зыщигъэгъозагъ, цIыфхэм гущыIэгъу афэхъугъ.

Республикэм ипащэ апэрэ чIыпIэу зэкIолIагъэр урамэу Герценым ыцIэ зыхьырэм тет унэхэу NN-у 100-мрэ 104-мрэ арых. Мыхэм ящагухэм язэтегъэпсыхьан Iоф дэзышIагъэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ДОРТРАНС» зыфиIорэр ары. IофшIэнхэр мэкъуогъум и 20-м рагъажьэхи, мэзитIум ехъукIэ аухыгъэх. Щагум изэтегъэпсыхьан сомэ миллиони 4,3-м ехъу пэIуагъэхьагъ. Дизайн-проектым къыдыхэлъытагъэу щагу кIоцIым игъогу агъэцэкIэжьыгъ, къэшIыхьэгъэхэ кIэлэцIыкIу ыкIи спорт площадкэхэр, къэзыгъэнэфырэ пкъыгъохэр, хэкIыр зэратэкъощт псэуалъэхэр, тIысыпIэхэр агъэуцугъэх, автомобиль уцупIэхэр агъэпсыгъэх, нэмыкIэу ашIагъэр бэ. Мы унитIум ащыпсэухэрэм къызэраIуагъэмкIэ, проектэу щыIэм диштэу агъэнэфагъэр зэкIэ зэшIохыгъэ хъугъэ. АщкIэ АР-м и ЛIышъхьэ, муниципалитетым ипащэхэм, псэолъэшIхэм афэразэх.

ЫпэкIэ щагухэм язытет уигъэрэзэнэу зэрэщымытыгъэр цIыфхэм къыхагъэщыгъ. Джы ахэр аужырэ шапхъэхэм адештэх, анахь шъхьаIэр сабыйхэр зыщыджэгунхэ алъэкIыщт чIыпIэхэр яIэхэ зэрэхъугъэр ары. Фэтэрыбэу зэхэт унэхэм ачIэсхэри IофшIэнхэм чанэу къахэлэжьагъэх, амалэу яIэмкIэ яшIуагъэ къагъэкIуагъ. ИгъэкIотыгъэ гъэцэкIэжьынхэмкIэ программэм амалэу къытыхэрэри къызфагъэфедэнхэ гухэлъ зэряIэр, унэхэм язэтегъэпсыхьан зэрэлъагъэкIотэщтыр къэзэрэугъоигъэхэм къаIуагъ. Гъэхъагъэхэм адакIоу, гумэкIыгъоу яIэхэмкIи цIыфхэм республикэм ипащэ зыкъыфагъэзагъ, шъхьэихыгъэу зэдэгущыIагъэх.

ЩыкIагъэу зигугъу къашIыгъэхэр псынкIэ Iофэу дэгъэзыжьыгъэнхэ зэрэфаер АР-м и ЛIышъхьэ хигъэунэфыкIыгъ, ащкIэ къулыкъухэм, муниципалитетым ипащэхэм пшъэрылъ гъэнэфагъэхэр афишIыгъэх.

— Мыщ фэдэ IофшIэным цIыфхэр хэщэгъэнхэм мэхьанэшхо иI, сыда пIомэ яшIуагъэ къызэрэкIощтым дакIоу, ащ фэдэ екIолIакIэм ахэр зэрепхых, зыкIыныгъэ къахелъхьэ, — къыIуагъ КъумпIыл Мурат. — Щагухэм, общественнэ чIыпIэхэм, паркхэм язэтегъэпсыхьан тапэкIи лъыдгъэкIотэщт. Непэ пшъэрылъ шъхьаIэу тиIэр тицIыфхэм ящыIэкIэ-псэукIэ нахьышIу шIыгъэныр ары.

Урамэу «12 Марта» зыфиIорэм иунэу N 136-м щыкIогъэ IофшIэнхэм сомэ миллиони 2,1-м ехъу апэIухьагъ. ЫпшъэкIэ зигугъу къэтшIыгъэ организациер ары щагум изэтегъэпсыхьан фэгъэзэгъагъэр. IофшIэнхэр бэдзэогъум и 9-м рагъажьэхи, охътэ кIэкIым пшъэрылъыр зэшIуахыгъ. Щагу кIоцIыр шэпхъэшIухэм адиштэ хъугъэ, цIыфхэри ащ лъэшэу рыразэх.

«ЩыIэкIэ Iэрыфэгъу къэлэдэсхэм яIэныр» зыфиIорэ проектым къыдыхэлъытэгъэ Iофтхьабзэхэр гъэцэкIэгъэнхэм пае (щагухэм язэтегъэпсыхьан) мы илъэсым муниципальнэ образованиеу «Къалэу Мыекъуапэ» субсидиеу сомэ миллион 69,5-рэ къыфатIупщыгъ. Ащ щыщэу сомэ миллион 56,1-м ехъур — федеральнэ гупчэм, сомэ миллиони 6,2-р — республикэм, сомэ миллиони 7,1-р чIыпIэ бюджетым къатIупщыгъэх.

ЗэрагъэнэфагъэмкIэ, 2018-рэ илъэсым фэтэрыбэу зэхэт унэ 33-рэ къызэлъызыубытырэ щагу 20 зэтырагъэпсыхьащт. Джырэ уахътэм ехъулIэу щагуи 8-мэ IофшIэнхэр ащэкIох, 12-р зэтырагъэпсыхьэгъах.



Возврат к списку